Mitski grad anđela

Los Anđeles je mitski grad. Naravno, on zaista postoji, ali skoro svako na planeti ima svoja očekivanja i zamišljenu sliku u glavi o tome šta je to LA, i šta to nudi Kalifornija. Pogrešno bi bilo reći da je većina tih slika zapravo pogrešna, jer iako su očekivanja posve drugačija, možda LA na sve njih zapravo odgovara?

Ušuškan između okeana i planina južne Kalifornije, ispod sunca koje uvijek miluje taman koliko treba i visokih palmi duž beskrajnih bulevara, LA je grad fantastične realnosti. Bolje rečeno, grad između fantazije i realnosti, i to do te mjere da i kad se nađete u njemu niste sigurni šta je zaista šta – gdje prestaje fantazija, i počinje realnost? Ima teoretičara koji bi se složili da se realnost kao nigdje drugo na svijetu briše kada kročite u ovaj grad, jer su se u svaki njegov kutak sva ona očekivanja koje su popularna kultura, supkulture, i prije svega dobar brending, pažljivo i duboko utkali.

Slike i fantazija

Nema geografske lokacije na svijetu koja je proizvela toliko slika i fantazija o sebi kao Los Anđeles. Naravno, za to ogromnu zaslugu ima filmska industrija, koja se ovde ugnjezdila. Zašto baš tu? Iz više razloga, svojevrsnog bijega u slobodu novog potencijala nepreglednog nenaseljenog prostora, fantastične prirode i varijeteta predjela, i apsolutno – dobre klime. Možda danas, sto godina kasnije, ovi isti elementi privlače milione u ono što se više ne naziva grad, već nepregledni konglomerat urbanog i suburbanog između pustinje i Pacifika. U tome svakako pomaže san, koji prožima svaki kutak ovog jedinstvenog fenomena koji je čovek izgradio – a možda još i bolje brendirao i plasirao.

Ali, prije slika i predstava, šta je zapravo fizički LA? Rijetko mjesto na svijetu, možda i jedino, gdje ni sami stanovnici nisu uvijek sigurni u kome gradu žive ili kojim mjestom koračaju. Izgrađeno tkivo niže se u beskraj, jedan entitet preliva se u drugi, i tako čitavih 12.310 kilometara kvadratnih.

Danas bi se prije moglo govoriti o okrugu Los Anđelesu (County of LA), nego o gradu Los Anđelesu (City of LA). Grad Los Anđeles čini oko trećinu čitavog okruga, i jedan je od njegovih 88 gradova. Specifičan i po tome da se, npr, čuveni Zapadni Holivud, Beverli Hils, Kalver Siti, Dolina San Fernando i Santa Monika uopšte ne nalaze u gradu Los Anđelesu, ali su sa svih strana njime okruženi. Grad sa enklavama, dok se s druge strane duga ruka grada tankim kopnenim pojasom probija na jug, sve do lučkog dijela okeana.

Nepregledno prostranstvo

Ali, ta administracija posjetiocima nije ni bitna. Jer svi združeni okruzi, mjesta i gradovi, povezani su ogromnom i funkcionalnom mrežom auto-puteva, zgodno nazvanim brojevima. Sa 10 do 12, a ponegde i 13 traka, LA auto-putevi postali su nezamjenjivi dio urbanog pejzaža. Zapravo, i najčešće se s jednog do drugog dijela okruga, ili grada, stiže tako što se samo sagledava prostranstvo kolovoznih traka.

Ono što jeste bitno, to je razumjeti ove razdaljine. U LA se neće tek tako skoknuti s plaže do dauntauna, sa dobre klope u Koreataunu u izlazak u Zapadnom Holivudu, ili s uživanja u prizorima raskošnih vila Beverli Hilsa do skrivenih kuća Malibua. Zapravo, hoće – sve je dobro povezano, ali treba malkice više vremena, jer je i fizički veoma raštrkano. I to je jedna od glavnih prostornih karakteristika ovog urbanog fenomena – suburbano je izgubilo značenje u predjelima Los Anđelesa, a urbano dobilo neke sasvim drugačije forme od onih kojih očekujemo, i možda baš zato ovaj grad tj. okrug prevazilazi sva očekivanja, dok ih sve vrijeme pothranjuje poznatim prizorima. Sa izuzetkom dauntauna, LA je nepregledno prostranstvo niskih kuća, širokih bulevara, visokog rastinja, pokojeg brda i beskrajnog pjeska u kontrastu okeana, gde se krajevi nižu bukvalno poput gradova.

Downtown LA

Downtown LA, ili DTLA, mjesto je administracije i biznisa, ali i burnog uličnog života, brojnih klubova i restorana, pa i manjih kulturnih četvrti kao što su Chinatown ili Little Tokyo. DTLA je destinacija i za muzeje i galerije, murale i za razliku od ostatka okruga – nebodere. Takođe, to je i mjesto nekih od najboljih profesionalnih prilika, i opet, posve drugačije od ostatka konglomerata. Južno od njega prostire se South-Central LA, poznat kao afroamerička rezidencijalna četvrt, opjevana u kultnim rep pjesmama i često ilustrovana kao čuveni geto u filmovima. Naravno, i ovaj kraj nudi daleko više nego što to poručuje popularna kultura, a naročito po pitanju istorije LA Afroamerikanaca. A tik uz njega pruža se Kompton, koga je rep kultura načinila svjetski poznatim imenom, kao što vjerovatno većina LA zvuči odnekud poznato.

Koreatown

Zapadno od DTLA prostire se Koreatown, vibrantna četvrt i po svojoj arhitekturi i kulinarskoj ponudi. Kada se prođe Fairfax, u kojoj se nalazi ulica, za koju bi danas mnogi rekli da je „naj-kul“ u LA, jer je posh shopping center, ali zaista živopisne kulture, a zatim i Melrose Ave, avenija šopinga, restorana i noćnih izlazaka, niskih kuća i visokih palmi, prostire se zaseban grad, iako se to ni po čemu ne vidi, Beverli Hils. Beverli Hils spada u najbezbjednije dijelove LA okruga. Nije ni čudo kada je prožet raskošnim vilama glumaca i elitnih biznismena, od kojih prolaznici samo mogu vidjeti bogato rastinje koje ih okružuje. To je i jedan od razloga zašto mnoge svjetski poznate četvrti LA mogu da razočaraju željne posjetioce – najbolji prizori baš to i jesu zato što, nažalost, nisu dostupni svima.

Hollywood

Hollywood spada u najpoznatije destinacije svijeta, a ipak vjerovatno svako, ko se prvi put tamo zadesi, se iznenadi šta vidi. U LA stilu, niskih kuća i širokih bulevara, sa pokojom višespratnicom koja prekida niz, uz beskraj znakova i reklama, drvoredima palmi i obaveznim kalifornijskim planinama u pozadini, turistička atrakcija koja mnoge oduševi, a mnogim drugima nema baš šta da ponudi. Iako su se mnogi filmski studiji odavde iselili, Hollywood Walk of Fame ne prestaje da privlači milijarde turista širom svijeta. Ali, ono što još krije ova svjetski poznata četvrt, to su barovi i noćni klubovi Sunset Strip bulevara, u kome se dešavala, i još se dešava istorija.

Pijesak i okean

Dok se sjeverno pruža San Fernando Valley, tj. the Valley, u čijim raskošnim vilama su se od znatiželjnih očiju sakrile brojne svjetske zvijezde, niže na zapad, pored čuvenih LA muzeja, pristiže se do okeana. I tu započinje, na sjever i na jug, neprekidno i nepregledno prostranstvo kalifornijskih pješčanih plaža. Okrug LA prostire se na 110 km plaže Tihog okeana, uz mnoštvo planina, uvala, ostrva, rijeka, jezara, i naravno, pustinja.

Na sjeveru Malibu, od koga posjetioci mogu da vide mahom garaže dobro sakrivenih raskošnih kuća, a na jugu Santa Monica, Venice, Manhattan, Redondo, Long, Huntington, Newport Beach… I tako dalje duboko u Orange County i dalje na jug van njega, prostiru se plaže i njihove četvrti od kojih je svaka opjevana u nekoj pjesmi, svjetski poznata po nekom filmu ili seriji, ili kao legendarno mjesto različitih supkultura, trendova i istorijskih momenata.

Prostranstvo koje prožima LA County, zapravo cijelu sjevernu Ameriku, ali koje je na tako jedinstven i specifičan način otjelotvoreno u izgrađeno tkivo u ovoj nepreglednoj tački svijeta, možda se najbolje može osjetiti u beskrajnom pojasu pijeska, iza koga se unedogled prostire okean. Svaka od ovih plažnih četvrti ima svoju istoriju, priču i kulturu. Ipak, ono što im jeste zajedničko, to je specifičnost prostranstva i okeana, a mahom i ležernost plažnog života. Naravno, to nije onaj mediteranski duh, već je ćudljiv poput okeana i pun kontrasta, kao i multikulturalna Sjeverna Amerika.

LA je jedinstveno mjesto na svijetu po svom urbanizmu, po arhitekturi koja mahom izgleda kao da je sklepana od najjeftinijih materijala, bez ikakvih regulativa i normativa, a ipak, svaka kuća vrijedi nekoliko miliona, po onome šta je čovjek izgradio i brendirao, ali ono što svakako vrijedi ne smetnuti s uma – južna Kalifornija je, prije svega, mjesto fantastične i raznovrsne prirode. I možda baš iz toga crpi svoju fantastičnu snagu ovaj mitski grad.

(citymag)

Z. N.

(NovaSloboda.ba)